El fagne, cwand l'leune si lêt djus...

Par Jean de la Marck

Oûy, a matin, tot m'lèvant, dji r'louke po l'fignesse et dji m'aporçu qu'il a nîvé tote li nut'. Dji sondje : i fêt bê, c'est mitwèt l'bon djoû po-z-alé fé ‘ne pitite porminade divins les « Fagnes ». On s'arindje avou ‘ne cope di vwèzins et, après l'dîner, on mousse el l'vwèture. Vo-nos- la évoye adlé li « Signal di Botrange ». On va-st- alé prinde on bol di fris' êr et mitwèt fé on pô dè « ski de fond ».

Tot minant m'vwètûre, dji sintéve ine sacwè qui m'groûléve è vinte ? Ine fèye, dji m'mètéve so ‘n fèsse èt pwis ‘ne fèye so l'ôte. Dj'aveu  compris qu'dj'aléve sûr avu l'coûre-vite. Tot-estant qu'dji sèréve lès fèsses come dji poléve, nos –arivîs tot l'minme a « Signal di Botrange ». Come dji poû, dji d'hind dèl vwèture po-z-alé a botike, cwèri dès skis. E ‘botike, dji d'mande a louweû po-z-alé a cabinêt. « I-n-a nou cabinêt chal » mi rèspond-i. Vo-m'la gaye, avou m'vinte qui fêt co traz pleûs. Tot sôrtant dè botike, djènnè poléve pus, dj'aléve fé è m'cou-d'-tchasses. Dji n'wèzéve pus bodjî.

Tot d'on côp, dji veû so l'costé, ine p'tite vôye. Dji cwite tot l'monde èt k'mince a cori come on sot, po sâyî dè trové ‘ne cwène po fé mi ptite comission. Dji coréve, dji coréve tant-ét pus, sins sèpi wice qui dj'aléve.

Tot d'on côp, a hintche , dji veû on coupe feû. Dji mousse divins, i-n-aveut bin swèsante çantimètes di nîvaye. A grandès-ascohèyes  dj'adare so ‘n-andrwet wice qu'on n' poléve ma di m'vèyî. Dji bodje mi « parka », dji bahe mi pantalon, dji m'acropih èt là…….Qué boneûr !
Dj'esteû anfin souladjî. Qwand dji m'a r'drèssî, et qu'dj'a vèyou l'plèce wice qui……, i-m'a pris ine djôye ! Mès deûs fèsses estît imprimêyes el nîvaye avou on bê trô a mitan. Tot riyant, dji riv'na adlé m'feume et mès camarades et raconta mi -astrapade. Dji les aveû quwité vert come ine seûre pome et vo-m-la riv'nou fris'come ine rôse. Awè, mins inte di nos ôtes, dji creû  qu'lès sapins n'avi maye vèyou in si bèle leune è plein djou. Quéquès pormineus on mutwè trovés on passèdje di « martiens ». Alé don saveûr !!!!